Heimsmeisturunum hent heim

Heimsmeistarar Spánverja eru á heimleið. Það er ljóst þó svo enn eigi eftir að spila eina umferð í riðlakeppninni. Hörmulegir Spánverjar töpuðu gegn Síle í kvöld, 2-0.

Holland og Síle er því bæði komin í sextán liða úrslit og spila um toppsætið í lokaumferðinni.

Ólíkt því sem búist var mættu Spánverjar ekki tilbúnir í leikinn. Þeir voru arfaslakir á meðan hugrakkir Sílemenn sáu um það að sækja.

Þessi frábæri leikur Sílemanna skilaði þeim tveim mörkum í fyrri hálfleik og heimsmeistararnir á leið heim.

Spánverjar gerðu breytingar strax í leikhléi. Koke kom inn fyrir Xabi Alonso en það breytti ekki nógu miklu.

Mörkin komu ekki og Diego Costa var þá skipt af velli en hann hefur valdið vonbrigðum á mótinu. Hann er heldur ekki vinsæll hjá löndum sínum fyrir að hafa valið að spila fyrir Spán og var hraustlega baulað á hann er hann hljóp af velli.

Það var alveg sama hvað Spánverjar reyndu í leiknum. Það gekk nákvæmlega ekkert upp og Spánverjar halda því heim á leið með skottið á milli lappanna.