Bandaríkin muni beita þrýstingi

Alþjóðadýravelferðasjóðurinn hvetur bandarísk stjórnvöld að til beita Íslendinga þrýstingi til að taka vitrænar ákvarðanir og láta af hvalveiðum. Innanríkisráðuneyti Bandaríkjanna hefur staðfest kæru til Barack Obama forseta þess efnis að hvalveiðar íslenskra aðila brjóti samning um bann við verslun með tegundir viltra dýra í útrýmingarhættu.

Þettur kemur fram í fréttum Bylgjunnar í hádeginu. Barack Obama hefur um sextíu daga til að tilkynna Bandaríkjaþingi hvort hann hyggist beita Íslendinga þvingunum vegna hvalveiða. Samskonar staða kom upp árið 2011 en þá ákvað Obama að beita íslensk stjórnvöld pólitískum þrýstingi. Sigursteinn Másson, fulltrúi Alþjóðadýravelferðarsjóðsins á Íslandi, býst við harðari aðgerðum nú.

„Málið er alvarlegra núna,“ segir Sigursteinn. „Staðan 2011 var sú að þá var að klárast fimm ára kvóti sem þáverandi sjávarútvegsráðherra, Einar K. Guðfinnsson, ákvað að gefa út á langreyðu og hrefnu. Nú þegar það er búið að gefa út nýjan fimm ára kvóta, sem er algjörlega andstætt hagsmunum Íslands, þá er málið litið miklu alvarlegri augum.“

Sigursteinn vonar að íslensk stjórnvöld sjái að sér og komi í veg fyrir að hvalveiðar séu stundaðar á hrefnu og langreyði.

„Við styðjum að Bandaríkin beiti íslensk stjórnvöld þrýstingi til að þau taki vitrænar ákvarðanir í þessum málum. Við hinsvegar höfum aldrei stutt viðskiptaþvinganir eða efnahagsþvinganir gegn Íslandi. Ég hinsvegar óttast það nú að Bandaríkjamenn sjái sig tilknúna til að vera með ákveðnari þrýsting gegn Íslandi heldur en áður.“

Nærri 175 þúsund farþegar fóru í hvalaskoðun hér á landi á árinu 2012. Sigursteinn telur það bestu sjálfbæru nýtinguna á hvalastofnum sem hugsast getur.

„Það hefur komið mjög skýrt í ljós að eina raunverulega, sjálfbæra nýtingin á hvalastofnum við Ísland sem gerir Íslandi mjög gott, er hvalaskoðun. Þarna er verið að fórna meiri hagsmunum fyrir minni.“