Klettaskóli kaupi sjálfur spjaldtölvur

„Með hverjum hafnfirskum nemenda í Klettaskóla greiðir Hafnarfjarðarbær fullt gjald. Inn í þeirri upphæð á að vera allur kostnaður við nemandann, þar með talinn kennslubúnaður eins og spjaldtölvur,“ segir fræðsluráð Hafnarfjarðar sem hafnaði beiðni um að styðja kaup á spjaldtölvum í Klettaskóla.

Reykjavíkurborg rekur Klettaskóla sem kom í stað Safamýrar- og Öskjuhlíðarskóla á árinu 2011 og þjónar nemendum með þroskahömlun og fjölfötlun á grunnskólastigi. Fjórtán af 109 nemendum skólans eru úr Hafnarfirði.

„Vegna fjárskorts hefur Klettaskóla gengið hægt að eignast nægilega margar iPad-spjaldtölvur til að nýta ríkulega nútímatækni í kennslu nemenda og útfæra þá stefnu að nemendur skólans geti unnið með og nýtt sér þá tækni sem nútímasamfélag býður upp á,“ segir í styrkbeiðni skólan. Fram kemur að nemendur með mikla hreyfihömlun eigi tiltölulega auðvelt með að stjórna iPad.