Kona afhöfðuð í Lundúnum

Sérstaklega ógeðfellt morð átti sér stað í norður-Lundúnum í dag þegar kona var afhöfðuð.

Atvikið átti sér stað í bakgarði íbúðarhúsnæðis við götuna Nightgale Road í Edmonton-hverfinu en lögreglumenn fundu konuna í garðinum þegar þeir komu á vettvang rétt eftir hádegi í dag.

Í tilkynningu frá bresku lögreglunni kemur fram að einn karlmaður hafi verið handtekinn vegna málsins.

Samkvæmt vitnum á staðnum hljóp árásarmaðurinn eins og óður maður um svæðið þegar lögreglan kom á vettvang.

Lögreglumenn þurftu að beita vopnum til að yfirbuga hann en einn lögreglumannanna úlnliðsbrotnaði við handtökuna.