IMMI varar við skýrslu Eggerts og Eyglóar

IMMI, alþjóðleg stofnun um upplýsinga- og tjáningarfrelsi, varar við því að útgáfufélög og fjölmiðlar gangi gegn prinsippum blaðamennskunnar til þess að styrkja vörumerki sín. Eins og fram hefur komið í skýrslu Franca ehf., þeirra Eggerts Skúlasonar og Eyglóar Jónsdótturog Vísir greinir frá er stjórn DV ráðlagt að deila kostnaði vegna meiðyrðamála með blaðamönnum. Þetta kemur fram í fréttatilkynningu sem IMMI sendi frá sér nú síðdegis en undir hana ritar Guðjón Idir Guðnýjarson, framkvæmdastjóri IMMI.

Þar segir að vitaskuld sé aðeins um ráðleggingar almannatengslafyrirtækis að ræða en IMMI varar þó við því að blaðamenn séu látnir taka þátt í kostnaði vegna slíkra mála. „Slíkt hefði í för með sér mikil kælingaráhrif en ljóst er þeim sem vilja sjá að löggjöfina í meiðyrðamálum þarf að taka til gagngerrar endurskoðunar. Reifuð hafa verið ýmis sjónarmið vegna þessa en vert er að benda á að IPI (Alþjóðlega fjölmiðlastofnunin) gaf út skýrslu um stöðu laga í Evrópu vegna meiðyrðamála fyrr í ár.“

Þá er bent á IPI hafi gefið út fréttatilkynningu vegna kröfu Þóreyjar Vilhjálmsdóttur, aðstoðarmanns innanríkisráðherra, um hámarks refsingu til handa blaðamönnum DV vegna fréttar fyrr í ár. Scott Griffen, ráðgjafi stofnunarinnar, segir: „Við erum, í sannleika sagt, gáttuð á þeim óhóflegu kröfum sem farið er fram á í þessu mál (...) Það að opinber starfsmaður fari fram á fangelsun eða í raun refsingu yfir höfuð vegna þess sem virðist hafa verið heiðarleg mistök gerð í alvarlegri rannsókn sýnir ekki virðingu fyrir eftirlitshlutverki fjölmiðla.“

Bent er á eru stjórnvöld á Íslandi, í skýrslu IPI frá í sumar, hvött til að fara í löngu tímabærar umbætur á meiðyrðalöggjöfinni. Ljóst er að breytinga er þörf til að vernda fjölmiðla og blaðamenn, án hverra við búum ekki við eina að megin forsendum virks lýðræðis: upplýsingu. Griffen segir ennfremur: „Þetta mál sýnir fullkomlega að svo lengi sem meiðyrðamál eru í refsirétti, mun hættan á misbeitingu þeirra og mögulegra kælingaráhrifa á fjölmiðlasamfélagið vera til staðar. Við hvetjum Ísland, sem áður hafði auglýst sig sem vörð tjáningar og upplýsingafrelsis, til að framkvæma þær nauðsynlegu umbætur á meiðyrðalöggjöfinni í samræmi við alþjóðlega mælikvarða. Auk þess að afnema refsingarákvæði, ættu slíkar umbætur að fela í sér þak á skaðabætur og, sérstaklega, klausu er léttir ábyrgð af blaðamönnum svo lengi sem þeir hafi starfað í góðri trú og í samræmi við almennar siðareglur.“

IMMI tekur heilshugar undir sjónarmið IPI. Þá er vikið að því sem fram kemur í skýrslu Franca ehf. að æskilegt væri fyrir DV að ritskoða frekar sitt athugasemdakerfi. IMMI hvetur þá fjölmiðla sem vilja halda úti athugasemdakerfi að gefa ekki falsmynd af viðhorfum sem þar koma fram með ritskoðun.