Hope Solo handtekin

Einn besti markvörður sem kvennafótbolti hefur alið af sér, Hope Solo, var handtekin á föstudagskvöldið á heimili sínu í Kirkland í Washingtonfylki.

The Seattle Times greinir frá því að Solo hafði lamið systur sína og frænda og var í kjölfarið handtekin á heimili sínu sem hún deilir með eiginmanni sínum Jerramy Stevens fyrrum leikmanni Seattle Seahawks í NFL deildinni í Bandaríkjunum.

„Það var stór veisla heima hjá henni. Aðstæður voru stjórnlausar,“ sagði Mike Murray lögregluvarðstjóri í Kirkland.

„Það voru sjáanlegir áverkar á fórnarlömbunum,“ bætti Murray við.

Þetta er ekki fyrsta reynsla Hope Solo af heimilisofbeldi. Stevens var handtekinn fyrir að ráðast á Solo árið 2012 en aðeins klukkustundum eftir að hann kom fyrir dómara gengu þau í hjónaband.

Vegna handtökunnar verður Hope Solo ekki með bandaríska kvennalandsliðinu sem mætir Frakklandi á fimmtudaginn í Hartford Connecticut.