Ólafur Ingi með í mikilvægum sigri

Ólafur Ingi Skúlason lék allan leikinn fyrir Zulte-Waregem í belgísku úrvalsdeildinni sem tryggði sæti sitt í forkeppni Evrópudeildarinnar á næstu leiktíð með 3-1 sigri á Lokeren á heimavelli.

Thorgan Hazard kom Zulte-Waregem yfir á 13. mínútu og þremur mínútum síðar bætti Ibrahima Conté við öðru marki og var staðan í hálfleik 2-0.

Idrissa Sylla kom Zulte-Waregem í 3-0 á 90. mínútu en mínútu síðar minnkaði Nill De Pauw muninn en það var of lítið og of seint fyrir Lokeren.

Sex efstu liðin leika í úrslitakeppni um belgíska meistaratitilinn og er Zulte-Waregem tveimur stigum frá toppnum þegar liðið á tvo leiki eftir en öll þrjú liðin fyrir ofan liðið eiga leik til góða á morgun.

Zulte-Waregem getur ekki endað neðar en fjórða sæti deildarinnar og er því öruggt með sæti í forkeppni Evrópudeildarinnar.