Kona fékk heilablæðingu í kjölfar neyslu fæðubótarefnisins Jacked Power

Matvælastofnunin í Svíþjóð varar við fæðubótarefninu Jacked Power eftir að kona sem tók inn efnið í tengslum við líkamsrækt fékk heilablæðingu. Jacked Power er sagt auka árangur hjá þeim sem stunda íþróttir.

Efnið hefur verið selt í verslunum í Svíþjóð en nú hafa yfirvöld í Gautaborg, Malmö og Svíþjóð gert ráðstafanir til þess að stöðva sölu þess. Í grein í sænska læknablaðinu frá 5. september síðastliðnum segja læknar það vera skoðun sína að setja megi heilablæðingu konunnar í samhengi við neyslu hennar á fæðubótarefninu.

Katrín Guðjónsdóttir, sérfræðingur hjá Matvælastofnun, segir fæðubótarefni ekki háð samþykki eins né neins. „Ég veit ekki til þess að þessi vara sé til hér en það segir ekki alla söguna.

Það er skylda að tilkynna um sölu á fæðubótarefnum en það er nú eins og það er. Þar sem varan hefur ekki verið tilkynnt geri ég síður ráð fyrir að hún sé til sölu í verslunum hér. En hins vegar er hún aðgengileg í vefverslunum.“