Reyndi að bjarga manni frá hákarlakjafti

Maður lést í árás hákarls við austurströnd Ástralíu í gær, þrátt fyrir hetjudáð annars sundmanns sem dró hann á land. Mark Hickey synti fimmtán til tuttugu metra frá ströndinni til að bjarga manni sem hafði verið bitinn í hægri fótinn.

Hickey sagði fjölmiðlum í Ástralíu að hann hefði séð hákarlinn og fórnarlamb hans í sjónum og synt út til hans.

„Ég fór þarna út og hugsaði að ég yrði að ná þessum manni í land og ég reyndi það,“ hefur AP fréttaveitan eftir honum.

Hickey náði manninum á land og reyndi endurlífgun í um tuttugu mínútur, en hann lést vegna blóðmissis í sjónum. Hákarlinn hafði bitið stórt stykki úr hægra læri mannsins. Rannsókn stendur nú yfir á sárinu svo hægt sé að greina tegund og stærð hákarlsins.

Samkvæmt lögreglu á svæðinu sá áhöfn björgunarþyrlu hvítan hákarl á svæðinu eftir að árásin átti sér stað. Öllum ströndum á svæðinu var lokað í sólarhring eftir árásina.

Þetta er fyrsta dauðsfallið í hákarlaárás í Ástralíu frá þriðja apríl. Þrátt fyrir að hákarlar séu fjölmargir við strendur Ástralíu hafa færri en tvö dauðsföll orðið að meðaltali árlega, síðustu ár. Í nóvember í fyrra létust tveir menn á innan við viku.