Bjarga 300 flóttamönnum úr bát undan ströndum Kýpur

Kýpversk yfirvöld reyna nú að bjarga 300 manns sem eru fastir í bát undan vesturströnd eyjarinnar. Talið er að farþegar bátsins séu sýrlenskir flóttamenn og að stæstum hluta konur og börn.

Að sögn talsmanns kýpverskra yfirvalda barst neyðarsending frá bátnum sem sigldi í slæmu veðri og fannst hann um 100 kílómetrum suður af bænum Paphos. Í frétt BBC segir að þyrlur séu þegar á vettvangi og skip á leiðinni.

Mikil aukning hefur orðið á þessu ári í fjölda þeirra flóttamanna sem reyna að sigla frá Norður-Afríku til Evrópu í leit að betra lífi. Bátarnir sem notaðir eru eru jafnan vanbúnir og ofhlaðnir.

Sú mikla aukning sem orðið hefur stafar ekki síst af öllum þeim sem eru nú á flótta undan borgarastyrjöldinni í Sýrlandi, en flestir reyna að sigla áleiðis til annað hvort Ítalíu eða Möltu.