Eygló vill ekki hlífa vændiskaupendum

Þekktir lögmenn, svo sem Vilhjálmur H. Vilhjálmsson og Brynjar Níelsson, velta fyrir sér prinsippum er snúa að opnu þinghaldi í málefnum meintra vændiskaupenda. Andi hinna umdeildu laga um kaup og sölu á vændi er sá að þeir sem uppvísir verða að því kaupa vændi verði nafngreindir -- aðeins þannig nái ætlaður fælingarmáttur fram. Eygló Harðardóttir félagsmálaráðherra er ein þeirra sem lagt hefur áherslu á þetta atriði.

Einar Tryggvasonkrafðist þess fyrir hönd ríkissaksóknara við þingfestingu í morgun að þinghald yrði opið í máli fjörutíu einstaklinga sem ákærðir hafa verið fyrir vændiskaup eða tilraun til vændiskaupa. I  dómstjóri tók sér frest til þriðjudags til að kveða upp úrskurð sinn í málinu. Þeirri niðurstöðu, hver svo sem hún verður, er svo hægt að skjóta til Hæstaréttar. Meðferð málsins í héraði var frestað til 17. desember.

Sveinn Andri Sveinsson, verjandi eins mannanna, mótmælti því með vísan til 10. greinar sakamálalaga, a og d liða, sem fjalla um að þinghöld skuli lokuð til hlífðar sakborningi, brotaþola, vandamanni þeirra, vitna eða af velsæmisástæðum. Hann segir aftur kominn upp ágreining um hvort þinghöld í þessum málum skuli haldin fyrir luktum dyrum eða ekki. „Hæstiréttur mun hafa síðasta orðið í þessu eins og öðru.“

Vilja auðmýkja og smána hina ákærðu

Vilhjálmur H. Vilhjálmsson lögmaður er einn þeirra sem veltir málinu fyrir sér og hann ritar stuttan pistil á Fb-síðu sína þar sem hann lýsir því yfir að þetta sé beinlínis sorgleg krafa hjá ríkissaksóknara.

„Gapastokkurinn var aflagður sem refsitæki á Íslandi árið 1808 meðal annars af mannúðarástæðum. Tveimur öldum og ótal mannréttindasamningum síðar vill ríkissaksóknari endurvekja þetta forna refsitól og auðmýkja og smána ákærðu opinberlega. Ef sök sannast er sektargreiðslan sem ákærðu verða dæmdir til þess að greiða algjört aukaatriði í samburði við aftökuna á mannorði viðkomandi sem ríkissaksóknari gerir kröfu um að fari fram í beinni útsendingu,“ segir Vilhjálmur og bendir á að rétt sé að hafa í huga að mannorð þeirra sem verða hugsanlegir sýknaðir af vændiskaupum verður líka lagt í rúst nái krafa ríkissaksóknara fram að ganga: „Nú er mikilvægt að héraðsdómur standi í lappirnar.“

Fælingarmáttur laganna

Álfheiður Ingadóttir, fyrrverandi heilbrigðisráðherra, mælti fyrir vændisfrumvarpinu á sínum tíma, þar sem leitt var í lög að kaup væru refsiverð en sala vændis ekki. Hún hefur fordæmt lokað þinghald í málum sem þessum, gerði það meðal annars í úttekt Pressunnar, það græfi undan fælingarmætti og anda laganna. Eygló Harðardóttir félagsmálaráðherra var Álfheiði hjartanlega sammála fyrir fjórum árum og sagði að „nöfn vændiskaupenda hlytu að koma fram í dómi héraðsdóms yrðu þeir sakfelldir. Þeim ætti ekki að hlífa umfram til dæmis dæmda nauðgara.“

Vísir hafði samband við ráðherra og hún tjáði miðlinum það að hún hafi í engu breytt um skoðun.

Fordómar saksóknara gegn vændiskonum

Brynjar Níelsson þingmaður Sjálfstæðisflokksins og lögmaður leggur orð í belg hjá Vilhjálmi, og hann bendir á tvískinnung sem hann telur að felist í þessari afstöðu.

„Skilgreindi löggjafinn ekki vændiskaup sem kynferðisbrot gegn seljandanum? Síðast þegar ég vissi var ríkissaksóknari alltaf sá sem krafðist lokaðara þinghalda í kynferðisbrotamálum. Hvers eiga fórnarlömb kynferðisofbeldis í þessum málum að gjalda? Hefur embættið einhverja fordóma gegn þessum fórnarlömbum sem þurfa að þola gífurlegt ofbeldi af hendi kaupenda sem stofnar auðvitað sálarheill þolans í stórkostlega hættu?“