Lánsmaðurinn ungi frá Juve að bjarga Sassoulo

Domenico Berardi, 19 ára strákur sem er á láni frá Juventus, er langt kominn með að bjarga nýliðum Sassoulo frá falli úr ítölsku A-deildinni í fótbolta.

Domenico Berardi skoraði í kvöld sína þriðju þrennu á tímabilinu þegar Sassoulo vann gríðarlega mikilvægan 4-3 útisigur á Fiorentina en hann lagði einnig upp fjórða markið.

Sassoulo komst með þessu upp í 31 stig og er nú tveimur stigum fyrir ofan fallsæti þegar tvær umferðir eru eftir.

Fyrr í vetur varð Domenico Berardi var næstyngsti leikmaðurinn í sögu ítölsku deildarinnar til þess að skora fernu í leik og jafnframt sá eini sem nær að skora fernu á móti AC Milan.

Hann skoraði einnig þrennu í 4-3 útisigri á Sampdoria og sigurmarkið í 1-0 sigri á Chievo á dögunum.

Domenico Berardi hefur skorað sextán mörk og lagt upp önnur sjö í 27 leikjum sínum með Sassoulo á leiktíðinni en hann hefur átt beinan þátt í 23 af 38 mörkum liðsins.

Sassoulo hefur leikið níu leiki án Berardi á leiktíðinni og tapað sjö þeirra þar af samanlagt 1-7 í leikjunum við meistara Juventus.