Stærsta veggmynd Reykjavíkur

„Þetta er samsteypu verknaður sem endurspeglar okkar sýn á menninguna,“ segja Baunadalsbræðurnir Óli og Freyr, sem hafa málað litríka veggmynd á húsgafli Borgarbókasafnsins. „Það endaði í siðferðislegri ádeilu á núverandi samfélag í svokölluðu myndmáli.“

Myndin tók tvær vikur í vinnslu og er nú stærsta veggmynd Reykjavíkur frá því að mælingar hófust. „Þetta er bara hvernig við sjáum höfnina. Myndin sem við teiknuðum fyrir var allt öðruvísi en svo breytist það bara með tímanum, maður lendir í svo mörgu í millitíðinni og setur það inn á myndina.“

Að sögn Freys báðu þeir bræður um að fá að mála myndina. Þeir fengu aðstoð frá Tæki.is sem hjálpuðu þeim að teygja sig upp í þakenda með lyftum og Málningu hf. sem gaf þeim málninguna frítt af fyrra bragði. „Í rauninni borguðum við ekkert rosalega mikið fyrir þetta og komum eiginlega út í sléttu, sem er frábært,“ segir Freyr.