Bandarískur læknir laus við ebóluveiruna

Bandaríski læknirinn Kent Brantly, sem smitaðist af ebóluveiru í Líberíu í síðasta mánuði, verður útskrifaður af sjúkrahúsi í Atlanta í Bandaríkjunum síðar í dag eftir að blóðprufur gáfu til kynna að hann væri laus við veiruna.

Læknar í Bandaríkjunum gerðu tilraunir með að gefa Brantly blóð úr sjúklingi sem lifði af ebólasmit, í þeirri von að blóðgjöfin yrði til þess að hann myndi mynda mótstöðu gegn veirunni. Þá var honum einnig gefið tilraunalyfið ZMapp.

Fréttamannafundur verður haldinn á sjúkrahúsinu síðar í dag þar sem Brantly mun lesa yfirlýsingu og læknar segja frá bataferlinu.

Brantly og bandaríski trúboðinn Nancy Writebol, smituðust bæði af ebólu í lok júlímánaðar og voru flutt til Bandaríkjanna 5. ágúst. Writebol er enn haldið í einangrun á sjúkrahúsinu í Atlanta, en á fréttamannafundinum verður einnig sagt frá líðan hennar.

Í frétt CNN segir að Brantly og Writebol, auk þriggja heilbrigðisstarfsmanna í Líberíu, hafi öllum verið gefið tilraunalyfið ZMapp og virðast þau öll vera á batavegi.

Brantly starfaði fyrir samtökin Samaritan's Purse í Líberíu og sagðist forseti samtakanna, prédikarinn Franklin Graham,vera mjög ánægður með að Brantly skuli hafa jafnað sig.