Aldrei meira atvinnuleysi í Frakklandi

Tæplega 3,5 milljónir manna er atvinnulausar í Frakklandi og hafa aldrei fleiri verið án vinnu þar, samkvæmt opinberum tölum.

Atvinnuleysi jókst í nóvember, þriðja mánuðinn í röð, en þá bættust rúmlega 27.000 á atvinnuleysisskrá. Því hefur atvinnuleysi aukist um 5,8% síðastliðið ár og er nú 10,4%.

Eitt afloforðum Francois Hollande, Frakklandsforseta, í kosningabaráttunni 2012 var að skapa fleiri störf og lýsti hann því nýlega yfir að ef honum tækist það ekki myndi hann ekki bjóða sig fram að nýju árið 2017.

Fyrr í þessum mánuði voru kynntar nýjar aðgerðir yfirvalda til að berjast gegn stöðnun í atvinnulífinu með það að markmiði að skapa fleiri störf, en óvíst er hvort aðgerðirnar dugi til, sérstaklega í ljósi nýrra talna um atvinnuleysi.