Fátækrahverfin í Reykjavík: "Þetta er algjörlega ótækt ástand“

Tæplega níu hundruð manns á höfuðborgarsvæðinu eru í brýnni neyð vegna húsnæðisskorts. Borgarstjóri segir kreppu ríkja í húsnæðismálum hjá ákveðnum hópi en borgarráð hefur samþykkt tillögu borgarstjóra um að fjölga félagslegum leiguíbúðum um fimm hundruð.

Fjallað var um búsetu í iðnaðar- og atvinnuhúsnæði í heimildaþættinum Brestir á mánudagskvöld. Búseta sem þessi er birtingarmynd húsnæðisvandans sem blasir við sveitarfélögum á höfuðborgarsvæðinu, einkum og sér í lagi Reykjavík.

Þörfin fyrir félagslegt húsnæði er sannarlega mikil. Í Hafnarfirði, Kópavogi og Reykjavík eru samanlagt þrettán hundruð einstaklingar á biðlista eftir húsnæði. Þar af eru átta hundruð sextíu og níu í brýnni þörf fyrir húsnæði.

Leiguherbergin sem voru til umfjöllunar í Brestum eru í einkaeigu og eins og greint var frá í kvöldfréttum Stöðvar 2 í gærkvöld hafa félagsráðgjafar í Kópavogi og Reykjavík margoft vísað skjólstæðingum til leigumiðlunar af þessum toga. Dæmi eru um að sveitarfélögin hafi greitt slíkum leigusölum milliliðalaust leigutryggingu.

„Þetta endurspeglar auðvitað mjög alvarlega stöðu á leigumarkaði,“ segir Dagur B. Eggertsson, borgarstjóri í Reykjavík. „Ég ef ekki legið á þeirri skoðun minni að það er í raun kreppa í húsnæðismálum hjá ákveðnum hópi. Þess vegna er þetta svona brýnt úrlausnarefni.“

Eygló Harðardóttir, velferðarráðherra og þar með ráðherra húsnæðismála, tekur í sama streng:

„Þetta er algjörlega ótækt ástand. Samkvæmt könnun okkar frá því í sumar kom fram að um tvö þúsund manns eru nú á biðlista eftir húsnæði hjá sjö stærstu sveitarfélögum landsins. Þetta er fólkið sem er í mestum félagslegum og fjárhagslegum vanda í okkar samfélagið við einfaldlega verðum að breyta þessu.“

Borgarráð samþykkti í dag tillögur Dags um að heimila Félagsbústöðum að fjölga félagslegum leiguíbúðum borgarinnar um fimm hundruð á næstu fimm árum. Þessi fjárfesting nemur um þrettán komma fimm milljörðum króna. Dagur segir samþykktina mikilvægan lið í áætlun borgarstjórnar um að fjölga leigu- og búseturéttaríbúðum um tvö þúsund og fimm hundruð.

„Við erum að vinna með einkaaðilum á uppbyggingarsvæðum um að öll ný svæði sem fara nú í uppbyggingu verði með að minnsta kosti fjórðung alls húsnæðis á leigumarkaði. Þannig að við fáum miklu heilbrigðari húsnæðismarkað. Við horfum núna til þess að það verði tekið af skarið með aðgerðir fyrir leigumarkaðinn bæði húsaleigubætur en líka hvað stuðning ríkið ætlar að koma með inn í uppbyggingu á húsnæði af þessu tagi.“

Eygló bendir á að það sé hlutverk sveitarfélaga að skaffa félagslegt húsnæði. Engu að síður geti ríkið stutt við bakið á fólki með húsaleigubótum og öðrum aðferðum.

„Það er alveg ljóst að við þurfum að setjast niður með sveitarfélögunum og fara yfir hvað þarf að gera meira til að taka á þessum vanda. Þarf mögulega að skerpa á lagaskildunni? Því við hljótum öll að vera sammála um að þessi staða er algjörlega ótækt,“ segir Eygló að lokum.