Óskilorðsbundið fangelsi fyrir að kýla lögreglukonu

Rúmlega fertugur karlmaður var í Héraðsdómi Reykjavíkur í dag dæmdur í þriggja mánaða skilorðsbundið fangelsi fyrir að hafa kýlt lögreglukonu í janúar í fyrra. Þá er honum gert að greiða allan sakarkostnað og málsvarnarlaun verjanda síns.

Manninum var gefið að sök að hafa kýlt lögreglukonuna með krepptum hnefa fyrir utan heimili hans í Hraunbæ á nýársnótt í fyrra. Af atlögunni hlaut konan bólgu og mar á höku.  Kvað hann lögreglukonuna hafa verið óviðeigandi í garð eiginkonu sinnar.

„Lögreglukonan var örugglega lesbía og sýndi konunni minni merki um það,“ sagði maðurinn við aðalmeðferð málsins sem fram fór 3.nóvember síðastliðinn.  „Ég er giftur maður og þetta er óviðeigandi í Lettlandi. Þar er eðlilegt að maður verji konuna sína.“

Lögreglukonan sagði þó að hún hefði engin samskipti haft við eiginkonu hans. „Um leið og ég kom inn í íbúðina kom hann beint að mér, mjög ógnandi og byrjaði strax með svívirðingar og að ýta í mig. Ég sá konuna aldrei – hún var uppi í rúmi allan tímann,“ sagði lögreglukonan.

Maðurinn sagði eiginkonu sína hafa verið með lungnabólu umrætt kvöld og verulega verkjaða. Því hafi hann hringt á sjúkrabíl en hún neitað að þiggja aðstoð. Eftir að verkir hennar hafi farið að ágerast hafi hann ákveðið að hringja öðru sinni en sjúkraflutningamenn óskuðu þá eftir aðstoð lögreglu. Ekki var þó tekið fram hvers vegna það var gert.

Sjúkraflutninga- og lögreglumenn sem báru vitni í málinu kváðu hjónin hafa verið verulega drukkin þegar á staðinn var komið. Maðurinn hafi verið rólegur framan af en þegar lögregla kom á heimili þeirra hjóna hafi ákærði reiðst, þá sérstaklega í garð lögreglukonunnar og ausið yfir hana svívirðingum.

Krafist var að maðurinn yrði dæmdur til refsingar og greiðslu alls sakarkostnaðar en brot gegn valdstjórninni geta varðað allt að sex ára fangelsisvist. Dómara þótti ástæða til að skilorðsbinda brot hans en þau geta haft ítrekunaráhrif verði hann dæmdur aftur. Ekki liggur fyrir hvort maðurinn muni áfrýja úrskurðinum.