Kýldi lögreglukonu í Hraunbæ og kallaði hana vændiskonu

Aðalmeðferð í máli ríkissaksóknara á hendur 43 ára lettnesks karlmanns sem gefið er að sök að hafa kýlt lögreglukonu fór fram í Héraðsdómi Reykjavíkur í dag. Manninum er gefið að sök að hafa kýlt konuna með krepptum hnefa fyrir utan heimili hans í Hraunbæ 1. janúar 2013. Af atlögunni hlaut konan bólgu og mar á höku.

Maðurinn var ásamt túlki í vitnaleiðslum í dag. Kvað hann eiginkonu sína hafa verið með lungnabólgu og verulega verkjuð og því hafi hann hringt á sjúkrabíl. Var það í annað sinn sama kvöld sem maðurinn hringdi á sjúkrabíl en í bæði skiptin neitaði konan að þiggja nokkurs konar aðstoð.

Sjúkraflutningamenn báðu um aðstoð lögreglu þegar símtalið barst öðru sinni, en ekki kom fram hvers vegna það var. Tóku þeir þó fram að hjónin hafi bæði verið verulega drukkin. Ákærða hitnaði í hamsi við komu lögreglu á heimili þeirra hjóna, sér í lagi í garð lögreglukonunnar, að sögn vitna. Sögðu þau hann hafa ausið yfir hana svívirðingum og meðal annars kallað hana vændiskonu.

„Við báðum lögregluna að fara út en lögreglukonan var örugglega lesbía og sýndi konunni minni merki um það. Ég er giftur maður og þetta er bara óviðeigandi í Lettlandi. Þar er eðlilegt að maður verji konuna sína,“ sagði ákærði í vitnaleiðslum, sem þó neitaði sök.

Þegar lögreglukonan var spurð út í meinta hegðun hennar kvaðst hún aldrei hafa séð konuna. „Um leið og ég kom inn í íbúðina kom hann beint að mér, mjög ógnandi og byrjaði strax með svívirðingar og að ýta í mig. Ég sá konuna aldrei – hún var uppi í rúmi allan tímann,“ sagði lögreglukonan.

„Þegar við erum komin út úr íbúðinni og inn í bíl kemur hann hlaupandi út, alveg brjálaður, ber að ofan. Hann byrjar þá að lemja í sjúkrabílinn og hleypur svo að lögreglubílnum. Hann kýlir þá tvisvar sinnum í hliðarrúðuna mín megin og ég fer út úr bílnum. Höggið á mig kom í kjölfarið,“ bætti hún við.

Verjandi mannsins spurði hann hvort það kynni að vera að hann hafi gert þetta óviljandi og sagði maðurinn það vera hugsanlegt. „Ég hef mjög slæma reynslu af lögreglunni sem hefur hótað að skrifa ýmislegt um mig og kæra mig. Reynslan er mjög slæm,“ svaraði maðurinn.

Eiginkona mannsins var ekki kölluð fyrir dóm þar sem hún var ekki vitni að málinu. Aðalmeðferð lauk í dag með munnlegum málflutningi lögmanna. Krafist er að maðurinn verði dæmdur til refsingar en brot hans gæti varðað allt að sex ára fangelsisvistar. Þá er jafnframt krafist að hann verði dæmdur til greiðslu alls sakarkostnaðar.