Innlent

Leit hafin á ný í Ölfusá

Gissur Sigurðsson og Kjartan Atli Kjartansson skrifa
Frá leitinni í nótt.
Frá leitinni í nótt. Vísir/Magnús Hlynur

Leit er hafin á ný að bíl sem ekið var út í Ölfusá á móts við Hótel Selfoss um klukkan hálf ellefu í gærkvöldi. Hátt í áttatíu manns leituðu án árangurs langt fram á nótt.

Nú eru um fjörutíu til fimmtíu manns sem leita bílsins. Meðal annars sigla björgunarsveitarmenn bát upp og niður ána. Einnig er leitað frá bökkum árinnar. Leitarmenn ganga með fram ánni og verið er að safna saman mannskap til þess að ganga niður alla ána og jafnvel niður að óseyrarbrú.

Nokkir leitarmenn fylgjast sem með úr meiri hæð og skima yfir svæðið. Kafarar eru að meta stöðuna, vegna straumhörkunnar á svæðinu sem maðurinn fór út í. Talið er að allt að hundrað manns muni taka þátt í leitinni í dag.

Vitni var að atvikinu í gærkvöldi. Það tilkynnti lögreglu þegar hvers kyns var og voru björgunaraðilar kallaðir út. Meðal annars kafarar með málmleitartæki og þyrla gæslunnar flaug yfir leitarsvæðið í nótt. Mjög djúpt og straumþungt er þar sem bíllinn fór út í og kann hann að hafa borist langt frá vettvangi.

Talið er víst að einn maður sé í bílnum og er vitað hver hann er. Björgunaraðilar koma saman til fundar innan stundar þar sem leitarstarfið í dag verður skipulagt. Þegar er ákveðið að bakkar árinnar verði gengnir niður undir Ölfusárós. Síðast fór bíll út í Ölfusá árið 1990. Þá drukknuðu tveir, en tveimur var bjargað.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.