Tónlistarskólar í Reykjavík á barmi gjaldþrots

Gjaldþrot blasir við sumum tónlistarskólanna í Reykjavík strax á næstu vikum eða mánuðum ef samkomulag ríkis og sveitarfélaga um tónlistarkennslu verður ekki endurskoðað, að mati skólastjóra Söngskóla Sigurðar Demetz. Túlkun borgaryfirvalda á samkomulaginu valdi því að skólarnir hafi ekki lengur efni á því að greiða kennurum sínum laun.

„Það virðist vera tvennur skilningur á því hvers vegna samkomulagið er gert eða hvernig það hefur verið framkvæmt,“ segir Gunnar Guðbjörnsson, skólastjóri Söngskóla Sigurðar Demetz. Í samkomulaginu um eflingu tónlistarnáms og jöfnun á aðstöðumun nemenda til tónlistarnáms, sem gert var milli ríkis og sveitarfélaga árið 2011, er kveðið á um nokkur hundruð milljóna króna fjárframlag ríkissjóðs í jöfnunarsjóð sem á að renna til framhaldsskólastigs í tónlistarskólunum.

„Borgin telur að með því hafi ríkið verið að taka yfir framhaldsnámið, og miðstig og framhaldsstig í söng,“ segir Gunnar. „Það virðist ekki vera skilningur annarra að það hafi verið þannig.“

Gunnar segir að fjárframlagi ríkisins, sem hafi einungis verið ætlað sem viðbótarframlag til skólanna, sé nú skipt á milli skólanna í Reykjavík og í staðinn borgi Reykjavíkurborg í raun ekkert úr eigin vasa með þessum nemendum. Greiðsla frá ríkinu í jöfnunarsjóð dugi ekki til að borga kennurum skólanna laun. Það sé þó einungis í Reykjavík sem staðan er svona þar sem önnur sveitarfélög brúi bilið með nemendum á framhaldsskólastigi.

„Við fáum alltaf sama svarið frá Reykjavíkurborg, að ríkið sé búið að taka þetta yfir og að þetta sé ekki þeirra mál,“ segir Gunnar. „Það er líka alveg skýrt að við megum ekki taka peninginn sem kemur frá skólagjöldum nemenda, og nota hann í kennsluna. Það er einfaldlega bannað samkvæmt reglugerð sem fylgir samkomulaginu.“

Skólarnir sem um ræðir, ásamt Söngskóla Sigurðar Demetz, eru Söngskólinn í Reykjavík og Tónlistarskólinn í Reykjavík. Þórunn Guðmundsdóttir, aðstoðarskólastjóri Tónlistarskólans, sagði í samtali við RÚV í dag að það sé hugsanlegt að skólinn geti ekki borgað kennurum sínum laun um næstu mánaðamót.

„Ég segi það ekki að við séum ekki að fara að hafa það fram yfir næstu mánaðamót en það sem er svolítið óþægilegt í augnablikinu er að við vitum ekki hvað borgin lætur okkur í té um mánaðamótin  á meðan verkfallinu stendur,“ segir Gunnar. Verði samið svo um hærri laun tónlistarkennara, sem enn eru í verkfalli, yrði þessi staða skólanna frekar verri en hitt. Óvissan sé því algjör.

„Nýr kjarasamningur myndi þó allavega rétt aðeins létta stemninguna yfir okkur,“ segir hann. „Núna hefur maður þessa tilfinningu að það velti allt á því hvað Reykjavík segir og gerir. Það verður mjög spennandi að sjá hvernig borgin ætlar að halda þessu til streitu. Við höfum ekki séð neitt sem styður mál borgarinnar í þessu máli.“