Lögreglumaðurinn gengst ekki við meintum brotum í starfi

Unnið er að því að skoða gögn úr eftirlitsmyndavél í lögreglubíl sem lögreglumaðurinn sem grunaður er um að hafa brotið af sér alvarlega í starfi keyrði. Lögreglan hefur einnig stafræn gögn úr eftirlitskerfi sínu til athugunar. Þetta segir Jónas Wilhelmsson, yfirlögregluþjónn á Eskifirði, en embættið fer með rannsókn málsins.

Lögreglumaðurinn hefur ekki gengist við því að hafa brotið af sér í yfirheyrslum að sögn Jónasar. Maðurinn er grunaður um að hafa fengið fólk til að greiða með reiðufé og stungið því í vasann. Engin rafræn slóð fylgir greiðslum í reiðufé, eðli málsins samkvæmt, og getur því reynst erfitt að fá nákvæma mynd af meintum brotum.

Óvíst er hvort hægt verði að finna út úr því nákvæmlega hversu háaum fjárhæðum maðurinn er talinn hafa stungið í vasann. Málið er umfangsmikið og litið alvarlegum augum en svo virðist sem margir veigamiklir þættir í rannsókninni séu enn óljósir. Ekki fást upplýsingar um hvað lögreglan telur að maðurinn hafi komið miklum fjármunum undan.

Lögreglan bíður einnig eftir gögnum erlendis frá en unnið hefur verið að því að hafa uppi á þeim ferðamönnum sem stöðvaðir voru af umræddum lögreglumanni til að hægt sé að fá mynd af umfangi meintra brota hans.