Býður einhverri alnöfnu fyrrverandi í heimsreisu

Ungur Kanadamaður leitar nú logandi ljósi að einhverri með sama nafn og fyrrverandi kærasta hans til að geta boðið henni í heimsreisu.

Toronto-búinn Jordan Axani birti auglýsingu á Reddit þar sem hann auglýsir eftir kanadískri konu með nafnið Elizabeth Gallagher til að hinir bókuðu flugmiðar fyrrverandi kærustunnar fari ekki spillis.

Jordan og fyrrverandi kærasta hans höfðu skipulagt heimsreisu um jólin en eftir að þau hættu saman leitar hann nú að nýjum ferðafélaga. Hann segir nafnabreytingu á flugmiðunum vera ómögulega og hafi hann því ákveðið að fara þessa leið.

Ferðin hefst þann 21. desember í New York og er flogið heim til Toronto þann 8. janúar. Í boði eru meðal annars heimsóknir til Parísar, Bangkok og Nýju-Delí.

Í auglýsingu sinni á Reddit segist hann ekki biðja um neitt í skiptum fyrir heimsreisuna. Hann vilji einungis deila reynslunni með einhverjum. „Það eina sem ég óska mér er að þú njótir ferðarinnar og að hún geri þig hamingjusama,“ segir Jordan.