Forvarsmenn fyrirtækisins ISNIC tiltóku ýmsar ástæður fyrir því að lokað var á lén samtakanna íslamska ríkið á fundi umverfis- og samgöngunefndar Alþingis sem fram fór í morgun.

Fjórir forsvarmenn frá fyrirtækinu voru gestir nefndarinnar. Auk þeirra voru þar aðrir gestir, til að mynda lögfræðingur Advania. Fjallað var um kaup samtakanna sem kölluð eru íslamska ríkið á íslenskum lénum.

Á fundinum var farið yfir málið frá hinum ýmsu hliðum og kom fram að þingmenn litu á fundinn sem lið í því að fá betri yfirsýn yfir það.

Virkuðu næstum því ósammála

Forsvarsmenn mættu á fundinn til þess að svara fyrir lokunina og tiltóku ýmsar ástæður fyrir henni. Raunar var það svo að Ingimundur Sigurpálsson, stjórnarformaður fyrirtækisins, og Steindór Dan Jensen, lögfræðingur fyrirtækisins, virkuðu nánast ósammála þegar þeir útskýrðu hvað lá að baki ákvörðuninni um að loka á lénin khilafah.is og Kilafah.is, sem aðilar á vegum íslamska ríkisins, eða Islamic State (IS) eins og það er kallað á ensku, höfðu keypt aðgang að.

Ingimundur stjórnarformaður útskýrði ákvörðunina um að loka lénunum tveimur út frá þeim forsendum að verið væri að verja landslénið .is. Þeir aðilar sem keyptu umrædd lén vísuðu til þess að .is stæði fyrir skammstöfun íslamska ríkisins á ensku. Hann sagði ákvörðunina hafa vafist mjög fyrir forsvarsmönnum fyrirtækisins, því hjá ISNIC sé unnið eftir þeirri megin reglu að taka ekki afstöðu útfrá efni.

„Þegar við vorum búin að kynna okkur alla þræði þessa máls sem við sáum yfir á þessum skamma tíma varð ákvörðunin ekki eins erfið og ætla mætti. Við töldum að lénakaupin væru að ógna léninu sem var verið að kaupa,“ sagði Ingimundur á fundinum og vísaði þar til þess að forsvarsmenn ISNIC hafi metið það sem svo að ef forsvarmenn íslamska ríkisins gætu vísað í .is sem lén samtakanna gæti það gjaldfellt virði lénsins í heild.

„Sú ástæða réð ákvörðuninni.“

Brot á landslögum

Steindór Dan Jensen, lögfræðingur ISNIC, vísaði aftur á móti í landslög þegar hann útskýrði ákvörðunina að loka lénunum tveimur. „Við réttlættum ákvörðunina með vísun í reglur fyrirtækisins,“ sagði hann. 



Steindór vísaði í níundu reglu fyrirtækisins um skráningu léna. Þar segir: „Rétthafi ber ábyrgð á að notkun lénsins sé í samræmi við gildandi lög og reglur á hverjum tíma.“

„Við réttlættum lokunina með vísun í reglur og viðskiptaskilmála. Þessi ákveðni málsliður vísar almennt í íslensk lög.“

Helmingur starfsmanna á móti ákvörðuninni

Auk Ingimundar og Steindórs voru þeir Jens Pétur Jensen framkvæmdastjóri og Maríus Jensen netstjóri gestir fyrir hönd ISNIC á fundinum í morgun. Jens sagði það fyrst og fremst hafa verið viðskiptalega og efnahagslega hagsmuni fyrirtækisins sem réðu því að lokað var á íslamska ríkið. Hann sagði efni síðunnar ekki beinlínis hafa haft áhrif. Hann sagði þó forsvarsmenn fyrirtækisins einnig geta fundið ákvörðuninni stoð í reglum þeirra.

Jens sagði ákvörðunina vera foræmalausa; þetta væri fyrsta lénið sem lokað væri á. Hann sagði að um helmingurinn af starfsfólki ISNIC hefði verið mótfallinn ákvörðuninni sem tekin var. Hann segir að hitafundur hafi verið haldinn með starfsmönnum fyrirtækisins á föstudaginn þar sem málið var rætt.