Rússar endurnýja kjarnavopnabúr sitt

Rússar hafa ákveðið að hraða uppfærslu á kjarnavopnabúri sínu. Dmitri Rogozin, aðstoðarforsætisráðherra landsins, segir í samtali við sjónvarpsstöðina Rossija 24 að búið verði að endurnýja alla kjarnaodda Rússlandshers í síðasta lagi árið 2020.

Í frétt DN kemur fram að Rússar hafi varið miklu fé til varnarmála að undanförnu og er áætluninni ætlað að fjármagna framleiðslu 2.300 nýrra skriðdreka, 1.200 þyrlna og orrustuþotna og hundrað gervihnatta.

Í viðtalinu viðurkennir ráðherrann einnig að til standi að endurnýja kjarnavopnabúr landsins, en Rússar búa nú yfir 1.800 kjarnaoddum, þar af 1.600 virkum.