Dýpsta vatn í heimi „að breytast í mýri“

Nýlegar rannsóknir benda til að Baikal-vatn, dýpsta stöðuvatn heims, sé á góðri leið með að breytast í mýri.

Umhverfisverndarsamtökin Baikal Ecological Wave segja rannsóknir sýna að ágengar þarategundir hafi breiðst gríðarlega út við strendur vatnsins sem er að finna í austurhluta Síberíu í Rússlandi.

Tegundirnar nærast á fljótandi úrgangi, en fleiri hundruð tonn af eldsneyti og saur eru losuð í vatnið á hverju ári.

Í frétt Moscow Times segir að skip sem sigla um vatnið losi einnig um 25 þúsund tonn af úrgangi í vatnið.

Baikal-vatn er stærsta ferskvatnsstöðuvatn í heimi, en áætlað er að um 20 prósent af ófrosnum ferksvatnsbirgðum heims sé að finna í vatninu. Vatnið er sömuleiðis dýpsta stöðuvatn í heimi, eða 1.642 metrar að dýpt.

Í fréttinni segir jafnframt að vatnið sé eitt það tærasta og elsta í heimi, en í hinu 25 milljón ára gömlu vatni er að finna einstakt vistkerfi.

Baikal-vatn er á heimsminjaskrá UNESCO og hefur þurft að þola mikinn umhverfisskaða allt frá því að pappírsverksmiðja opnaði við strendur vatnsins árið 1966.

Rússnesk yfirvöld höfðu lengið dregið það að loka verksmiðjunni sem var einn stærsti vinnustaður í borginni Baikalsk, en henni var loks lokað í desember síðastliðinn.