Fíkniefnabrotum fjölgaði en hegningarlagabrotum fækkaði

Kynferðisbrotum fjölgaði hlufallslega mest hegningarlagabrota, árið 2013. Helsta ástæða þess er að vændismál voru rúmlega fjórum sinnum fleiri árið 2013 en þau voru árið 2012. Alls fækkar hegningarlagabrotum um þrjú prósent á milli ára, en sérrefsilagabrotum fjölgar um rúm tvö prósent. Í tilkynningu frá Lögreglunni á höfuðborgarsvæðinu, segir að sú hækkun sé til komin vegna fjölgunar fíkniefnabrota.

Þetta kemur fram í skýrslunni Afbrot á höfuðborgarsvæðinu 2013, sem lögreglan gefur nú út í áttunda sinn.

Ekkert manndráp átti sér stað á höfuðborgarsvæðinu árið 2013 en þó voru fjórar manndrápstilraunir skráðar hjá lögreglunni. Ofbeldisbrotum fjölgar um þrjú prósent á milli ára og voru þau 781 árið 2013. Þá fækkar auðgunarbrotum um fimm prósent, en að mestu er það vegna fækkun innbrota.

Að jafnaði var tilkynnt um tvö innbrot á dag eða 71 innbrot á mánuði. Þar af voru um 38 prósent þeirra á heimili. Í tilkynningunni segir til samanburðar að árið 2010 hafi að meðaltali verið framin sex innbrot á dag.

Í fyrra voru 1.514 fíkniefnabrot skráð hjá Lögreglunni á höfuðborgarsvæðinu og hefur þeim verið að fjölga á síðustu árum. Þá einkum vegna fjölgunar brota er varða vörslu og meðferð ávana- og fíkniefna og sölu þeirra og dreifingu.

Þá var lagt hald á töluvert meira magn fíkniefna árið 2013 en árið 2012. Mest var tekið af maríjúana, eða um tæplega 31 kíló, og af amfetamíni, eða um 28 kíló.

17.539 einstaklingar voru kærðir fyrir brot í fyrra. Þar af voru 72 prósent karlar og 28 prósent konur. Um 76 prósent þeirra voru kærð fyrir umferðalagabrot. Flestir voru kærðir fyrir of hraðan akstur, eins og í fyrra, eða 10.283 einstaklingar.

590 konur og1.991 karl voru kærð fyrir hegningarlagabrot í fyrra. Flest þeirra voru á aldrinum 21 til 30. Hins vegar voru flestar konur á aldrinum 15 til 20 ára.