Krefjast þess að Kohver verði sleppt úr haldi Rússa

Evrópusambandið krefst þess að eistneskum lögreglumanni sem Rússar handtóku í síðustu viku fyrir njósnir verði sleppt úr haldi. Maðurinn hefur verið ákærður og gæti hann átt yfir höfði sér allt að tuttugu ára fangelsi.

Mikil spenna hefur ríkt í Moskvu og Tallinn síðan málið kom upp fyrr í þessari viku og staðhæfa yfirvöld í Tallinn að rússneskir útsendarar hafi numið  lögreglumanninn Eston Kohver af eistnesku landi og flutt hann með sér yfir landamærin.

Yfirvöld í Moskvu fullyrða þó að Kohver hafi verið við njósnir í Rússlandi og að í fórum hans hafi fundist upptökutæki og fimm þúsund Evrur.

Talsmaður Evrópusambandsins lýsti í gærkvöld yfir þungum áhyggjum vegna meints brottnáms Kohvers hinn 5.september síðastliðinn.