Hafa samþykkt leið til friðar í Úkraínu

Forseti Úkraínu, Petro Poroshenko, lýsti því yfir í morgun að hann hafi komist að samkomulagi við Vladimír Pútín Rússlandsforseta að gert verði vopnahlé í austurhéruðum Úkraínu þar sem stjórnarherinn hefur síðustu mánuði barist við aðskilnaðarsinna.

Rússar brugðust hinsvegar við yfirlýsingunni með því að segja að aðeins hafi verið komist að samkomulagi um að ræða næstu skref í deilunni. Þá var á því hnikkt að Rússar ættu enga aðild að átökunum.

Skömmu síðar var orðalaginu í tilkynningunni frá forsetaembættinu í Úkraínu breytt og segir nú á þá leið að leiðtogarnir hafi sammælst um næstu skref í átt til varanlegs friðar.

Uppfært 10:22

Fyrstu fréttir erlendra miðla af samkomulagi Poroshenko og Putin, voru byggðar á misskilningi. Upprunalega var fréttin svona:

Forsetar Úkraínu og Rússlands, Petro Poroshenko og Vladimir Putin, hafa komist að samkomulagi um vopnahlé við aðskilnaðarsinna í Austur-Úkraínu. Samkvæmt skrifstofu forsetans í Úkraínu komust forsetarnir að niðurstöðu sem muni leiða til friðar, en ekkert er farið nánar út í hvað það þýðir.

Um er að ræða vopnahlé í Donbass héraði þar sem borgirnar Donetsk og Luhansk, en harðir bardagar hafa geysað þar síðustu vikur.

Aðskilnaðarsinnar hafa enn ekki tjáð sig um vopnahléið samkvæmt AP fréttaveitunni. Þeir hafa áður virt einhliða vopnahlé sem Poroshenko setti á í júní síðastliðnum.