Forðuðu sér þegar þakið hrundi

Þak á íþróttahöll í Víetnam féll þegar alþjóðlegt mót í badminton fór þar fram. Atvikið náðist á myndband og sjást keppendur og áhorfendur forða sér þegar plötur úr loftinu falla niður á gólf með miklum látum.

Talið er að enginn hafi slasast þegar þakið féll niður á þriðjudaginn, en samkvæmt fréttum að utan voru keppendur og áhorfendur virkilega skelkaðir.

„Íþróttahöllin er of gömul, hún er næstum því þrjátíu ára og var beðið eftir því að þakið yrði lagað áður en þetta gerðist,“ segir Mai Ba Hung, sem starfar hjá íþrótta- og menningarráði Hanoi-borgar, í samtali við fréttastofu Reuters.

Verið var að keppa í hinu alþjóðlega móti Vietnam Open. Sigurlaunin í mótinu eru um sex milljónir króna.

Búið er að færa hið alþjóðlega mót í aðra íþróttahöll í Hanoi og er rannsókn hafin á atburðinum.

Post by FB Newswire.