Indland í viðbragðsstöðu vegna Al-Kaída

Stjórnvöld í Indlandi hafa sett nokkur héröð landsins í viðbragðsstöðu eftir að Al-Kaída tilkynnti stofnun nýs arms hryðjuverkasamtakanna í Indlandi og nærliggjandi löndum. Ayman Al-Zawahiri, leiðtogi hryðjuverkasamtakana tilkynnti þetta í myndbandi sem birt var í morgun. Þar segir hann markmiðið vera að reisa fána heilags stríðs á svæðinu.

Fram til þessa hafa engar vísbendingar litið dagsins ljós um að hryðjuverkasamtökin hafi haft viðveru í Indlandi.

Reuters fréttaveitan segir yfirvöld í Indlandi taka tilkynninguna alvarlega og að sveitarstjórnum og hérðasstjórnum hafi verið gert viðvart. Þó séu indverskir hermenn iðulega viðbúnir árásum indverskra íslamista og annarra samtaka sem staðsett eru í Pakistan. Ekki liggur fyrir hvaða skref verða tekin þar að auki.

Þá hefur fréttaveitan heimildir fyrir því að bæklingum Íslamska ríkisins hafi verið dreift í Pakistan síðustu daga. Birting myndbandsins og innihald þess er talið gefa í skyn fjandskap á milli IS og Al-Kaída.