Mikilvægasti leiðtogafundur NATO frá lokum kalda stríðsins

Framkvæmdastjóri Atlantshafsbandalagsins segir Rússa hafa ráðist á Úkraínu, en bandalagið lítur nú á Rússland sem fjandsamlegt ríki í fyrsta sinn frá lokum kalda stríðsins. Leiðtogar NATO komu saman í dag til að ræða breyttar aðstæður í öryggismálum bandalagsríkjanna.

Anders Fogh Rasmussen fráfarandi framkvæmdastjóri NATO sagði í Newport í Wales í dag að leiðtogafundurinn þar væri einn sá allra mikilvægasti í sögu Atlantshafsbandalagsins og fundurinn færi fram á mikil óvissutímum.

„Við stöndum frami fyrir gerbreyttum aðstæðum í öryggismálum. Í austri hafa Rússar ráðist á Úkraínu, í suðaustri höfum við séð hryðjuverkasamtökin Ríki íslam rísa og fremja hryllileg grimmdarverk og í suðri horfum við upp á ofbeldi, óöryggi og óstöðugleika," sagði Rasmussen við upphaf leiðtogafundarins í dag.

Ástandið í Úkraínu skyggir á flest önnur mál á leiðtogafundinum en Petro Poroshenko forseta landsins var boðið á fundinn til greina frá stöðu mála. Hann fundaði sérstaklega með leiðtogum áhrifaríkja innan NATO en bandalagið telur að minnst þrjú þúsund rússneskir hermenn og skriðdrekar berjist innan landamæra Úkraínu.

Aðildarríki NATO eru 28 en þau NATO-ríki sem áður tilheyrðu austurblokkinni og eiga landamæri að Rússlandi óttast um sinn hag og krefjast aukinna varna og viðveru Bandaríkjamanna innan landamæra sinna. Forseti Litháen sagði í dag að þegar innrásarríki setti einhliða fram friðartillögur eins og Rússar hefðu gert væri það ekkert annað en úrslitakostir.

Sergei Lavrov utanríkisráðherra Rússlands varaði leiðtoga NATO við því í dag að bjóða Úkraínu aðild að bandalaginu og hvatti til þess að menn samþykkt friðartillögur Vladimir Pútin forseta Rússlands í sjö liðum sem hann kynnti í gær.

Eftir fund með fulltrúum Öryggis- og samvinustofnunar Evrópu í dag sagðist Lavrov sannfærður um að ÖSE eins og mörg Evrópuríki vildu sigur fyrir alla þjóðernishópa í Úkraínu, en andúð hans á Bandaríkjastjórn leyndi sér ekki. Hún vildi ná fram sigri sínum og NATO í Úkraínu.