Einkaflugvél brotlenti við Jamaíka

Bandarísk einkaflugvél brotlenti við strendur Jamaíka í dag. Flugumferðarstjórar höfðu reynt að ná sambandi við stjórnendur vélarinnar um nokkurt skeið, án árangurs, áður en hún brotlenti. Flugvélin lenti í hafinu um 22 kílómetra norður af Jamaíka.

Flugvélar og skip frá eyjunni sem og Bandaríkjunum eru á leið á vettvang, en ekki liggja fyrir upplýsingar um fjölda farþega í vélinni.

AP fréttaveitan segir vélinni hafa verið flogið frá New York og að samkvæmt áætlun stóð til að henni yrði lent Flórída. Flugher Bandaríkjanna sendi orrustuþotur til að fylgja vélinni eftir að henni var flogið yfir Flórída og ekki náðist samband við flugmann vélarinnar.

Þetta er í annað sinn á einni viku sem flugmenn einkaflugvéla bregðast ekki við köllum flugumferðarstjóra, samkvæmt AP. Á síðast laugardag missti flugmaður einkaflugvélar meðvitund við flug yfir Washington, höfuðborg Bandaríkjanna. Þá sem og nú voru orrustuþotur sendar til að fylgja vélinni, en samband náðist aldrei við flugmanninn.

Sú vél brotlendi í Atlantshafið eftir að eldsneyti vélarinnar kláraðist.