Risastór sprenging í eldfjalli í Papúa Nýju-Gíneu

Eldfjallið Mount Tavurvur í Papúa Nýju-Gíneu gaus skömmu fyrir síðustu mánaðarmót. Fólk var flutt af svæðinu í kringum eldfjallið og flugvélar þurftu að sveigja frá því. Á meðfylgjandi myndbandi má sjá mikla sprengingu í eldfjallinu, en það var tekið upp þann 29. ágúst.

Samkvæmt AP fréttaveitunni gaf fjallið frá sér ösku, gufu og einstaka sprengingar, en óhætt er að segja að sprengingin sem náðist á myndbandið sé í stærri kantinum.

Sjá má ský fjúka í burtu vegna höggbylgjunnar sem fylgir sprengingunni og þegar hún nær til myndavélarinnar fylgir henni mikið högg og hár hvellur.

Mount Tavurvur er eitt virkasta eldfjallið á svæðinu og árið 1994 eyddist nærliggjandi þorp í eldgosi úr fjallinu.