Hætta sölu á Línu-gardínum

Forsvarsmenn skemmtigarðsins Astrid Lindgrens Värld í sænsku Smálöndunum hafa ákveðið að hætta sölu á sérstakri Línu langsokks-gardínu með mynd af tveimur þeldökkum börnum sem standa með stóra blævængi og kæla Línu.

Ákvörðunin er tekin í kjölfar umræðu á Facebook-síðu skemmtigarðsins þar sem móðir þeldökks sænsks barns spyr hvernig hægt sé að selja varning með mynd af tveimur börnum séu í hlutverki þræla Línu.

Fjölmargir taka undir með móðurinni og segja ómögulegt að selja varning með slíkri mynd árið 2014.

Í frétt sænska ríkisútvarpsins segir að myndin hafi fyrst verið notuð í bókinni „Lína langsokkur í Suðurhöfum“ frá árinu 1948.

Ove Olsson, sölustjóri skemmtigarðsins, segir starfsmennina alls ekki hafa litið á málið þessum augum. „Okkur datt það ekki í hug. En ég skil að það er óheppilegt að vera með mynd af þeldökku strákunum sem kæla Línu,“ segir Olsson í samtali við P3.