Ungir og vitlausir minkar á ferli

Uppi varð fótur og fit meðal nokkurra tónleikagesta á Stuðmannaballi í Hörpu um helgina þegar þeir rákust á mink í bílakjallara hússins. Þórunn Erna Clausen leikkona lýsti því með tilþrifum þegar hún rakst á mink eftir Stuðmannaball í Hörpu aðfararnótt laugardags. Þá hefur fréttastofu borist ábendingar um að oft megi sjá mink þarna í grjótgarðinum við ströndina við Sæbraut. Svo virðist sem minkur sé að færa sig uppá skaftið innan borgarmarka, eða er ekki svo, Guðmundur Þorbjörn Björnsson rekstrarstjóri meindýravarna Reykjavíkurborgar?

„Sko, minkur hefur náttúrlega alltaf verið á vissum svæðum innan borgarmarka. Þá er aðallega verið að tala um eyjarnar hér í  kring og árnar og vötn innan borgarmarka. En, í rauninni hefur orðið fækkun í mink. Það hafa ekki verið að koma margar kvartanir með þeirri undantekningu nú með haustinu, að kvartanir hafa verið að berast. Annars hefur verið lítið um mink fyrri part árs og reyndar síðustu tvö til þrjú árin.“

Guðmundur Þorbjörn kann engar skýringar á þessu, sem virðist fækkun minka, en hins hins vegar hefur refastofninn verið í verulegum vexti undanfarin ár. Guðmundur Þorbjörn treystir sér ekki til að segja til um hvort þetta tengist, því þess seú dæmi að greini þessara dýra liggi saman. En, hann gerir nú ráð fyrir því að refurinn hafi minkinn ef slettist uppá vinskapinn, hann sér stærri og sterkari. En, reyndar kemur á móti að minkurinn er grimmur.



„En, sem sagt og alla vega hefur ekki verið mikið um mink undanfarin tvö til þrjú ár. En það hefur heyrst svolítið af honum núna. Ég skal alveg viðurkenna það. Töluvert.“

Guðmundur Þorbjörn segir það í sjálfu sér ekki óeðlilegt: „Menn verða varir við þetta sérstaklega að hausti. Nú eru ungu dýrin komin af stað, yrðlingar frá í sumar. Og þeir eru ekki eins varir um sig og fullorðnu dýrin. Eins og maður heyrði af þarna í Hörpu um helgina. Þetta er væntanlega hvolpur sem er að flækjast um. Þeir sjást miklu meira á haustin út af þessu; þeir eru ekki eins hræddir við fólk,“ segir rekstrarstjóri meindýravarna borgarinnar.