Unglingur í fangelsi fyrir að neita að mæta í skólann

Fjórtán ára unglingur, búsettur í Flórída-fylki í Bandaríkjunum, var fangelsaður fyrir að neita að fara í skólann. Fjölmiðlar í Bandaríkjunum sögðu frá því um helgina að móðir 14 ára drengs hafi í síðustu viku hringt á lögregluna vegna þess að sonur hennar vildi ekki fara í skólann.

Hún tjáði lögreglu að hún væri orðin úrræðalaus gagnvart drengnum; Hún hafi tekið tölvuna hans, snjallsíma og takmarkað aðgang hans að netinu í refsingarskyni fyrir að skrópa. Drengurinn lét ekki segjast og brá því móðir hans á það ráð að hringja á lögregluna sem mætti á staðinn og handtók drenginn.

Fréttastofa ABC vitnar í Kenneth Carver, varðstjóra hjá lögreglunni í St. Augustine í Florda. Hann sagði drenginn hafa tjáð lögreglumönnum að hann vildi ekki fara í skóla í Flórída, fjölskyldan var nýflutt þangað en hafði áður búið í New York. Strákurinn vildi fá að halda áfram í skóla þar í borg.

Móðirin tjáði lögreglunni að sonur hennar hafi einnig skrópað þegar hann var í skóla í New York og að einkunnir hans hafi þegar verið byrjaðar að dala.

Þegar Carver sagði drengnum að hann yrði handtekinn fyrir að mæta ekki í skólann svaraði hann: „Gerðu það sem þú þarft að gera, ég ætla ekki í skólann.“

Hann þurfti að gista fangaklefa lögreglunnar fyrst um sinn en var síðar fluttur á unglingaheimili. Hann er nú kominn aftur í umsjá móður sinnar.

„Hugmyndin var að fá dómara til að skipa drengnum að mæta í viðtöl og meðferð þar sem honum verður hjálpað að aðlagast nýju umhverfi. Mamma hans var bara að reyna að fá hann til að gera það sem er rétt,“ segir Chuck Mulligan, sem er annar yfirmaður hjá lögreglunni í Flórída.