Norðmenn senda fanga til afplánunar í Hollandi

Norsk yfirvöld hyggjast senda allt að þrjú hundruð fanga til að afplána í fangelsi í Hollandi til að draga úr biðröðum og til að hægt sé að ráðast í viðgerðir á fangelsum landsins.

Samkvæmt nýgerðum samningi munu fangaverðirnir vera hollenskir, en fangelsisstjórinn Norðmaður. Þetta er ekki í fyrsta sinn sem Hollendingar gera slíkan samning, en þeir leigja nú þegar fjölda fangelsisplássa til Belga.

Fangelsi í Noregi eru nú þegar yfirfull þrátt fyrir að fjöldi fanga sé hlutfallslega lægri en víðast hvar annars staðar á Vesturlöndum.

Mikil þörf er á endurbótum á fangelsum landsins og er viðgerðarkostnaður áætlaður rúmlega 80 milljarðar króna. Munu viðgerðirnar leiða til þess að loka þarf nokkrum fangelsum tímabundið á meðan á framkvæmdum stendur.

Um 1.300 manns bíða nú afplánunar í Noregi. Búist er við að fyrstu norsku fangarnir hefji afplánun í hollensku fangelsi á næsta ári, en ekki verða neinir sendir til Hollands sem talin er að sérstök hætta stafi af.

Föngum í hollenskum fangelsum hefur fækkað jafnt og þétt frá árinu 2008.