Dóttir Saddams leggur fé til IS

Raghad Hussein, elsta dóttir Saddams Hussein, fyrrverandi einræðisherra Íraks, er ein af þeim sem fjármagnar hryðjuverkasamökin IS. Þetta hefur þýska blaðið Spiegel eftir heimildarmönnum sínum í Miðausturlöndum.

Raghad Hussein er í útlegð og býr í Jórdaníu, gegn loforði um að skipta sér ekki að stjórnmálum. Það kom þó ekki í veg fyrir að hún studdi árásir gegn bandarískum hersveitum í Írak árið 2007. Interpol vildi þá að Hussein yrði framseld, en jórdönsk stjórnvöld höfnuðu slíkri beiðni.

Spiegel hefur eftir heimildarmönnum sínum að Hussein vilji nú hefna sín á þeim sem komu föður hennar frá völdum og tóku hann af lífi. Síðast í júlí fagnaði hún framgangi IS í viðtali. Hussein á mikinn auð og segja heimildarmennirnir að ljóst þyki að hún sé ein af þeim sem leggi IS til fé.