Gamalt hús fær nýtt líf

130 ára gamalt sögufrægt hús hefur nú fengið nýtt líf, en því hefur verið fundinn varanlegur staður í miðbænum eftir að hafa staðið falið í iðnaðarhverfi úti á Granda síðustu ár. 

Gröndalshúsið svokallaða stóð við Vesturgötu 16 B en Sigurður Jónsson, járnsmiður, byggði húsið árið 1882 úr timbri sem barst til Íslands með gríðarstóru skipi sem rak mannlaust um hafið og strandaði í Höfnum.

Sigurður bjó sjálfur í húsinu og hafði þar járnsmíðju til 1888 en þá eignaðist það skáldið og náttúrufræðingurinn Benedikt Gröndal og hefur það verið kennt við hann síðan. Hjörleifur Stefánsson, arkítekt, hefur haft umsjón með endurbótum á húsinu sem var fært í iðnaðarhverfið á Granda fyrir nokkrum árum.

Húsið var oft kallað Púltið, Skrínan eða Skattholið vegna hins sérkennilega byggingarlags, en það er tvílyft að framan og einlyft að aftan.

Búið var í húsinu til ársins 2004, en Reykjavíkurborg keypti það til varðveislu vegna menningarsögulegs gildis þess. Upphaflega stóð til að húsið yrði flutt í Árbæjarsafnið.