Mikið dregur úr fátækt í Suður-Ameríku

Mikið hefur dregið úr fátækt í ríkjum Suður-Ameríku og Karíbahafi síðustu ár. Í nýrri skýrslu Sameinuðu þjóðanna kemur fram að um 56 milljónir fleiri búa ekki lengur við fátækt, borið saman við fjöldann árið 2000.

Skýrslan sýnir að hlutfall þeirra sem lifa undir fátæktarmörkum í álfunni hafi farið úr 41,7 prósentum í 25,3 prósent milli áranna 2000 og 2012.

Fjöldi þeirra sem falla undir skilgreiningu á millistétt, hefur jafnframt aukist úr 22  í 34 prósent á sama tímabili.

Í frétt BBC kemur fram að þrátt fyrir þróunina búa um 40 prósent Suður-Ameríkumanna við erfiðar efnahagslegar aðstæður.

Bólivía og Perú eru meðal þeirra ríkja sem hefur best tekist að minnka hlutfall þeirra sem búa við fátækt. Mikillar breytingar hefur einnig orðið vart í Chile og Argentínu.