Fjórir látnir þegar bátur sökk við Grænland

Fjórir hafa fundist látnir í dag eftir að bátur sökk við við vesturströnd Grænlands í gær. Að sögn lögreglu var sent út neyðarkall frá bátnum í gærkvöldi, skammt frá Appat, eyðibyggð í Diskoflóa á vesturströnd Grænlands.

Í frétt danska ríkissjónvarpsins segir að þyrla og fleiri bátar hafi verið notaðir við leitina í gærkvöldi sem hafi svo verið haldið áfram í morgun. Morten Nielsen, talsmaður lögreglu, segir að slæmt veður hafi verið til leitar.

Lögregla veit ekki með vissu hve margir hafi verið um borð í bátnum og því verður leit haldið áfram fram eftir degi. Enn á eftir að bera kennsl á hina látnu.