Handtekinn daglega í tvær vikur: „Því miður hefur ekki tekist að leysa úr vanda hans“

Lögregla kannar nú hvað hægt er að gera fyrir mann sem handtekinn hefur verið daglega undanfarnar tvær vikur í miðborg Reykjavíkur. Maðurinn er heimilislaus og hefur meðal annars verið handtekinn fyrir að panta máltíðir á veitingastöðum og neitað að borga og fyrir að valda ónæði á hótelum borgarinnar.

Óviðbúandi ástand

„Lögreglan hefur verið að leita úrræða fyrir manninn, bæði í heilbrigðisþjónustunni og félagsþjónustu,“ segir Kristján Ólafur Guðnason, stöðvarstjóri á lögreglustöðinni við Hverfisgötu. „Því miður hefur ekki tekist að leysa úr vanda hans.“

Maðurinn bíður nú yfirheyrslu og er mál hans er enn til skoðunar. Kristján segir að úrræði þurfi að finnast fyrir manninn.

„Ástand eins og þetta er ekki hægt að búa við, hvorki fyrir íbúa hér, yfirvöld eða hann sjálfan.“