Scolari hættur með Brasilíu

Samkvæmt brasilísku sjónvarpsstöðinni Globo TV hefur Luiz Felipe Scolari landsliðsþjálfari sagt af sér.

Scolari er 65 ára gamall og stýrði Brasilíu til heimsmeistaratitils árið 2002 eftir sigur á Þýskalandi í úrslitaleik, 2-0.

Hann tók aftur við liðinu árið 2012 og undir hans stjórn vann Brasilíu Álfukeppnina í fyrra. En liðið stóð ekki undir væntingum á HM í heimalandinu og tapaði síðustu tveimur leikjum sínum samanlagt, 10-1.

Mestu munaði um risatap gegn Þýskalandi, verðandi heimsmeisturum, í undanúrslitum keppninnar, 7-1, en það var stærsta tap brasilíska landsliðsins frá upphafi og fyrsta tap liðsins á heimavelli í mótsleik í 39 ár.

Brasilía tapaði svo, 3-0, fyrir Hollandi í leiknum um þriðja sæti keppninnar. Eftir leikinn sagði hann að framtíð hans væri í höndum forráðamanna brasilíska knattspyrnusambandsins.

Samningur Scolari átti að renna út eftir keppnina og sagði í frétt Globo TV að afsögn hans yrði staðfest í dag.