„Hefði getað farið svo miklu verr“

„Ég fékk símtal þrjár mínútur yfir fjögur á laugardagsnótt frá leigubílstjóra sem ég þekki til og hann sagðist hafa heyrt í talstöðinni að höfuðstöðvar fyrirtækisins væru alelda,“ segir Sævar Baldursson, eigandi Hópferða Sævars Baldurssonar. Þegar hann kom að höfuðstöðvum fyrirtækisins kom þó í ljós að eldurinn hafði ekki enn borist í húsið, heldur stóð ein af rútum fyrirtækisins í ljósum logum fyrir utan.

„Eldtungurnar voru byrjaðar að svíða þakkantinn og einn vegginn, en eldurinn læsti sig ekki í húsinu,“ útskýrir Sævar og segir það hafa verið ákveðinn létti. „Já, eins skelfilegt og það er að missa bílinn þá verður að viðurkennast að þetta hefði getað farið svo miklu verr. Rútur fyrirtækisins stóðu þarna hjá en sem betur fer sluppu þær.“ Víkurfréttir greindu fyrst frá málinu.

Sævar segir að enn sé verið að rannsaka hvernig kviknaði í rútunni. „Og á meðan málið er til rannsóknar veit maður ekkert með vissu, þannig að það er best að tjá sig ekkert um það.“

Fjárhagslegt tjón

Sævar gerði út tíu rútur og segir mikið hafa verið að gera allan ársins hring. „En núna eru rúturnar orðnar níu. Þetta kemur auðvitað á slæmum tíma, því sumarið er álagstími í ferðaþjónustunni. Við höfum þurft að hagræða aðeins hjá okkur bókunum og fleiru og það er útséð að við þurfum að fela einhverjum öðrum sum af þeim verkefnum sem við höfðum tekið að okkur.“

Þrátt fyrir að tapa einni af tíu rútum fyrirtækisins er Sævar sáttur að ekki fór verr. „Við höfum unnið hörðum höndum undanfarin tvö ár við að byggja fyrirtækið upp og eignast þetta hús. Þetta er hjarta starfseminnar okkar og það hefði verið alveg skelfilegt að horfa á eftir því.“

Sævar þakkar Slökkviliði Reykjanesbæjar fyrir skjót viðbrögð. „Já, þeir eru flottir strákarnir. Maður er þeim afar þakklátur. Þeir unnu sitt verk vel.“

Að sögn hans hafa margir boðist til að aðstoða fyrirtækið, meira að segja samkeppnisaðilar. „Ég er búinn að fá fjölda símtala frá fólki sem reiðubúið að hjálpa til, meira að segja samkeppnisaðilar hafa boðist til að aðstoða mig mig með rútumál og annað. Ég er þakklátur fyrir það,“ segir hann að lokum.