Kaká: Ég fæ vel borgað en þetta snýst ekki um peninga

Brasilíski knattspyrnumaðurinn Kaká er nýjasta stjarnan sem ætlar að spreyta sig í bandarísku MLS-deildinni í fótbolta, en hann var kynntur til leiks sem fyrsti leikmaður nýs liðs Orlando City í vikunni.

Kaká fékk samningi sínum hjá AC Milan rift áður en hann skrifaði undir við bandaríska liðið. Þar sem Orlando hefur ekki leik fyrr en á næsta ári mun hann spila með uppeldisfélagi sínu Sao Paulo fram að því.

„Undir lok síðustu leiktíðar fór ég að hugsa um framtíð mína; hvort ég færi aftur til Brasilíu, færi til Bandaríkjanna eða yrði áfram hjá Milan,“ segir Kaká en þvertekur fyrir að peningarnir hafi lokkað hann í MLS-deildina.

„Það var erfitt að yfirgefa AC Milan, en ég býst við því að fótbolti muni verða stærsta íþróttin í Bandaríkjunum. Þeir borga mér vel, en mér buðust meiri peningar annarsstaðar. Ég pæli meira í verkefninu framundan.“

„Ég var hjá Milan í sex ár, Real í fjögur ár og spilaði í Brasilíu í níu ár þannig ég hugsa alltaf til lengri tíma. Ég fæ vel borgað en ég gæti fengið meira hjá öðrum liðum,“ segir Kaká.

Brasilíumaðurinn leitaði ráða hjá David Beckham, fyrrverandi samherja sínum hjá AC Milan, áður en hann skrifaði undir hjá Orlando en Beckham varð tvöfaldur meistari með Los Angeles Galaxy í MLS-deildinni og er að stofna nýtt lið í Miami.

„Ég held þetta sé rétti tímapunkturinn því ég er ekki of gamall og ekki of ungur. Ég get enn komið með mikið inn í deildina sem er alltaf að verða betri. Ég er að kynna mér deildina þessa dagana. Bróðir minn og Beckham spiluðu hérna. Ég talaði mikið við Beckham. Þegar ég hef svo leik finn ég út hvernig ég get hjálpað að bæta liðið,“ segir Káka.