Van Gaal: Margt líkt með þessum liðum

Louis van Gaal, þjálfari Hollendinga, segir að hans menn og Kosta Ríka spili svipaðan fótbolta.

Liðin mætast í 8-liða úrslitum heimsmeistaramótsins í kvöld, en Hollendingar eru taldir mun sigurstanglegri fyrir leikinn. Louis van Gaal segir að Kosta Ríka-menn séu með gott lið, enda væru þeir ekki komnir svona langt án þess að hafa spilað vel.

„Þessi lið spila sömu taktík og vilja sækja á sama hátt. Einnig pressa þau á svipaðan hátt, þannig það er margt líkt með þessum liðum. Kosta Ríka liðið á að vera lakara liðið, en það er það sem kemur frá fjölmiðlum. Það eru ekki okkar orð."

„Okkar markmið hefur alltaf verið að verða heimsmeistarar og við höfum einnig sagt að við erum með lið sem mjög erfitt er að vinna. Hingað til höfum við sýnt það og vonandi höldum við því áfram."

Leikurinn í kvöld fer fram á sama velli og þegar Hollendingar tóku Spánverja og völtuðu yfir þá í riðlakeppninni, Fonte Nova leikvangnum.

„Við höfum eitt markmið og við styðjum allir hvorn annan. Holllenska liðið mun berjast fram á síðustu mínutu til þess að verða heimsmeistarar," sagði Louis van Gaal.