Banna Súpermann-merkið á minnisvarða um látinn dreng

Eigendur Súpermann-vörumerkisins hafa komið í veg fyrir að merki ofurhetjunnar verði á minnisvarða um fimm ára kanadískan dreng sem lést eftir að amma hans og afi höfðu svelt hann í hel í Toronto árið 2002.

Í frétt USA Today segir að Súpermann hafi verið drengnum, Jeffrey Baldwin, sérstaklega kær. Fjölskylda hans segir piltinn reglulega hafa klæðst Súpermann-búningi og stokkið af stólum í tilraun sinni að fljúga líkt og hetjan sín.

Fjármunum fyrir minnisvarða var safnað í kjölfar harmleiksins, en DC Entertainment leyfðu aðstandendum söfnunarinnar ekki að notast við Súpermann-merkið. „Þeir vildu í raun ekki láta tengja vörumerkið við barnamisnotkun,“ segir Todd Boyce sem fór fyrir söfnuninni. Hann segir forsvarmenn DC hafa íhugað málið alvarlega en að lokum komist að þessari niðurstöðu.

Bronsstyttan mun þó rísa þar sem S-inu í merkinu fræga verður breytt í J.