Þýska nían hafði ekki skorað á HM síðan 2002

André Schürrle var hetja Þjóðverja í kvöld þegar mark hans í framlengingu átti mikinn þátt í að tryggja þýska liðinu sæti í átta liða úrslitum á HM í Brasilíu.

André Schürrle kom inn á sem varamaður í hálfleik og kom þýska liðinu í 1-0 í 2-1 sigri á Alsír en markið hans kom eftir 93 sekúndna leik í framlengingunni. Schürrle skoraði með vinstri hælnum eftir stoðsendingu frá Thomas Müller.

Þetta var fyrsta mark Schürrle á HM í Brasilíu en með því að skora þetta mark varð hann fyrsti Þjóðverjinn í treyju númer níu sem nær að skora í lokakeppni HM í fótbolta síðan í keppninni í Japan og Suður-Kóreu fyrir tólf árum síðan.

Carsten Jancker var síðasta þýska nían til að skora á HM á undan Schürrle en Jancker gerði fjórða marka þýska liðsins í 8-0 sigri á Sádí-Arabíu í riðlakeppninni á HM 2002.

Mike Hanke spilaði númer 9 á HM í Þýskalandi 2006 og Stefan Kiessling var númer níu á HM í Suður-Afríku fyrir fjórum árum.