Íslendingur í fangelsi í Taílandi: Enn ekki borist ákæra í málinu

Íslendingurinn sem handtekinn var í Taílandi þann 6. júní síðastliðinn fyrir vörslu fíkniefna hefur enn ekki verið ákærður. Hann hefur tvisvar fengið að hitta ræðismann Íslendinga þar í landi sem aðstoðar hann eftir bestu getu.

Urður Gunnarsdóttir, upplýsingafulltrúi utanríkisráðuneytisins, segir það ekki endilega óvenjulegt á taílenskan mælikvarða að málið taki svona langan tíma.

„Við höfum sem betur fer ekki mikla reynslu af þessu, það eru ekki margir sem hafa lent þarna,“ segir Urður. „En þetta tekur bara tíma.“

Fíkniefnalög í Taílandi eru með þeim allra ströngustu í heimi. Maðurinn sem um ræðir var með metamfetamín í fórum sínum en það getur varðað fangelsi í eitt til tíu ár.