Boateng og Muntari reknir heim

Kwesi Appiah, landsliðsþjálfari Gana, hefur staðfest að stórstjörnunar Kevin-Prince Boateng og Sulley Muntari hafa verið reknir úr landsliðshópi Ganverja.

Mikið hefur gengið á í herbúðum Gana en í gær bárust fregnir af því að leikmenn liðsins hafi hótað verkfalli nema að staðið yrði við loforð um bónusgreiðslur til leikmanna.

Það varð svo til þess að forseti landsins lofaði að flogið yrði með þrjár milljónir Bandaríkjadala, jafnvirði 339 milljónum króna, til Brasilíu sem var svo gert í gær.

Í fjölmiðlum ytra er talað um að leikmenn hefðu gert uppreisn gagnvart forráðamönnum liðsins og að þeir hefðu neitað að ferðast frá bækistöðvum liðsins í Maceio til höfuðborgarinnar Brasilíu þar sem liðið mætir Portúgal í dag.

Til að bæta gráu á svart munu þeir Boateng og Muntari hafa slegist fyrir tveimur dögum síðan en mun sá fyrrnefndi hafa hreytt ónotum í landsliðsþjálfarann þegar hann spurðist fyrir um málið.

Þá er því enn fremur haldið fram að Muntari hafi veist að starfsmanni í liðsstjórn ganverska landsliðsins í gær.

Það virðist því sem svo að ekki hafi tekist að lægja allar ófriðaröldur í landsliðshópi Gana með peningasendingunni í gær en samkvæmt brasilískum fjölmiðlum mun stór hópur lögreglu- og hermanna hafa fylgt sendingunni frá flugvellinum í herbúðir landsliðsins.

Gana mætir sem fyrr segir Portúgal síðar í dag og þarf að vinna með tveggja marka mun til að komast áfram í 16-liða úrslitin en treysta jafnframt á að Þýskaland hafi betur gegn Bandaríkjunum á sama tíma.

BREAK: #GHA coach Kwesi Appiah confirms sacking Kevin-Prince Boateng and Sulley Muntari from team camp.

— Gary Al-Smith (@garyalsmith) June 26, 2014